Doctor Vikatan: முளைகட்டிய தானியங்களை (Sprouted grains) பச்சையாகச் சாப்பிடுவது நல்லதா அல்லது வேகவைத்துச் சாப்பிடுவது நல்லதா... இவற்றைச் சாப்பிட்டால் வாயுத் தொல்லை வருமா?
பதில் சொல்கிறார், கோவையைச் சேர்ந்த ஊட்டச்சத்து ஆலோசகர் கற்பகம்.
முளைகட்டிய தானியங்களை (Sprouts) எப்போதும் பச்சையாகச் சாப்பிடும்போது, பலருக்கு அசிடிட்டி (Acidity), கேஸ்ட்ரைட்டிஸ் (Gastritis) மற்றும் தொற்று (Infection) போன்ற பிரச்னைகள் ஏற்படுவதற்கான வாய்ப்புகள் அதிகம்.
மேலும், நாம் எந்த வகையான பயறை முளைக்கட்ட வைக்கிறோம் என்பதைப் பொறுத்தும் இது மாறுபடும்.
சிலர் கொள்ளு, கொண்டைக்கடலை போன்றவற்றை முளைக்கட்ட வைத்து, அதைத் தொடர்ந்து சாப்பிட்டு வரும்போது, அது கண்டிப்பாக அதிக வாயுத் தொல்லையை (Gaseous) உருவாக்கும். எனவே, முளைக்கட்டிய தானியங்களை, பச்சையாகச் சாப்பிடுவதைவிட, அவற்றை 5 முதல் 10 நிமிடங்கள் வரை நன்றாக ஆவியில் வேகவைத்து (Steam பண்ணி) சாப்பிடுவதுதான் எப்போதும் மிகச்சிறந்த வழிமுறையாக இருக்கும்.
சில நிமிடங்கள் வேகவைத்த பிறகு, அதனை சாலட்களில் (Salads) சேர்த்தோ அல்லது குழம்பு அல்லது கிரேவியில் (Gravy) சேர்த்தோ சாப்பிடலாம்.
வேக வைத்த தானியங்களை ஒரு கைப்பிடி அளவு மட்டும் ஒரு ஸ்நாக்ஸ் போலச் சாப்பிடுவதும் உடலுக்கு நன்மை பயக்கும்.
சில சமயங்களில், பச்சையாக இருக்கும் முளைக்கட்டிய தானியங்களில் பாக்டீரியாக்கள் இருக்கக்கூடும். இதுவும் கூட உங்களுக்கு வயிற்றுத் தொற்றை (Stomach Infection) ஏற்படுத்தலாம்.
எனவே, எப்போதும் முளைக்கட்டிய தானியங்களைச் சாப்பிடும்போது சில விஷயங்களை உறுதிப்படுத்திக் கொள்ளுங்கள். உடலில் நீர்ச்சத்து சரியாக இருக்கும்படி, போதிய அளவு தண்ணீர் குடிப்பதை உறுதி செய்ய வேண்டும்.
அதேபோல், அவற்றை சரியான நேர இடைவெளியில் சாப்பிட வேண்டும். இவற்றைப் பின்பற்றுவதன் மூலம், அசிடிட்டி மற்றும் வயிற்று உபாதைகள் போன்ற அறிகுறிகள் ஏற்படுவதை நம்மால் தடுக்க முடியும்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
from Vikatan Latest news
0 Comments