`4 கூடை கருப்பட்டி இருக்கு; வித்துட்டுத்தான் ஊருக்கு போவேன்' - சென்னையில் போராடும் தருமபுரி மூதாட்டி

காலை 7 மணி முதல் மாலை 6 மணி வரை கருப்பட்டி விற்பனை... இரவில் பேருந்து நிலையத்தில் உறக்கம்... 75 வயதிலும் யாரையும் சார்ந்து வாழாமல் வாழ்க்கைப் போராட்டத்தை முன்னெடுத்து வருகிறார் தருமபுரியைச் சேர்ந்த மாரியம்மாள்.

வயிற்றுப் பசியை போக்கும் கருப்பட்டி வியாபாரம்

பூந்தமல்லி பேருந்து நிலையம் அருகே கருப்பட்டி விற்று தனது வாழ்க்கையை நடத்தி வருகிறார், 75 வயதான மாரியம்மாள். வயது முதிர்ந்த நிலையிலும் தனது அன்றாட தேவைகளை நிறைவேற்ற யாரையும் சார்ந்து இருக்காமல், கருப்பட்டி விற்பனையை நம்பியே வாழ்ந்து வருகிறார். தருமபுரி மாவட்டத்தைச் சேர்ந்த மாரியம்மாள், தனது ஊரில் வியாபாரம் சரியாக நடைபெறாததால் கருப்பட்டி விற்பனைக்காக பூந்தமல்லிக்கு வந்துள்ளார். ஒரு வாரத்திற்கு முன்பு வந்த அவர், மீதமுள்ள கருப்பட்டிகளை விற்றுவிட்டுத்தான் மீண்டும் சொந்த ஊருக்குத் திரும்புவேன் என்கிறார்.

“இரண்டு கருப்பட்டி ரூ.30 தான்... ஆனா வியாபாரம் இல்லை”

இரண்டு கருப்பட்டிகளை ரூ.30க்கு விற்பனை செய்து வருவதாக கூறும் மாரியம்மாள், எதிர்பார்த்த அளவிற்கு வியாபாரம் நடைபெறவில்லை என வேதனையுடன் தெரிவித்தார்.

“கருப்பட்டி வாங்க வருபவர்கள் குறைவாக இருக்கிறார்கள். விற்பனை முடிந்தால்தான் அடுத்த வேலை பற்றி யோசிக்க முடியும்” என்று கூறுகிறார்.

"பேருந்து நிலையமே தங்குமிடம்"

தினமும் காலை 7 மணிக்கே வியாபாரத்தைத் தொடங்கும் மாரியம்மாள், மாலை 6 மணி வரை அங்கேயே இருந்து விற்பனை செய்கிறார். இரவு நேரங்களில் அருகிலுள்ள பேருந்து நிலையத்திலேயே தங்குவதாகவும் அவர் தெரிவித்தார்.

வயதான காலத்தில் இத்தகைய வாழ்க்கைச் சூழ்நிலையை எதிர்கொண்டாலும், மன உறுதியுடன் தனது பணியைத் தொடர்ந்து செய்து வருகிறார்.

கணவரை இழந்த பின் தொடங்கிய வாழ்க்கைப் போராட்டம்

மாரியம்மாளின் கணவர் ராமசாமி உயிரிழந்துவிட்டார். அவரைப் பற்றிப் பேசும்போது கண்கலங்கிய மாரியம்மாள், “அவர் உயிருடன் இருந்திருந்தால் நான் இவ்வளவு தூரம் வந்து கஷ்டப்பட வேண்டியிருக்காது” என்று வேதனையுடன் கூறினார். அவரது முகத்தில் தெரிந்த சோகமும் தனிமையும், வாழ்க்கையின் பல போராட்டங்களைச் சொல்லாமல் சொல்லியது.

“பிள்ளைகளும் என்னைப் பார்த்துக்கொள்வதில்லை"

தனக்கு ஒரு மகனும் மூன்று மகள்களும் இருப்பதாக கூறிய மாரியம்மாள், “பிள்ளைகள் யாரும் என்னை கவனித்துக் கொள்வதில்லை. அதனால்தான் இந்த வயதிலும் வேலை செய்து வாழ வேண்டியிருக்கிறது” என வருத்தத்துடன் தெரிவித்தார்.

நான்கு கூடைகள் விற்றுவிட்டால் ஊருக்குப் பயணம்

தற்போது தன்னிடம் நான்கு கூடைகள் கருப்பட்டி இருப்பதாகவும், அவற்றை விற்று முடித்த பின்னரே தருமபுரிக்குத் திரும்ப முடியும் என்றும் கூறினார். கருப்பட்டியை மொத்தமாக வாங்கி சில்லறை விற்பனை செய்து வருவதாகவும் தெரிவித்தார்.

கருப்பட்டியின் பயன்கள்

கருப்பட்டியின் பயன்கள் குறித்தும் மாரியம்மாள் விளக்கினார். காபி, டீ மற்றும் பலகாரங்கள் தயாரிக்க கருப்பட்டி பயன்படுத்தப்படுவதாகவும், நீண்டநாள் சளி தொல்லை மற்றும் தலைவலிக்கு நிவாரணமாக பலர் பயன்படுத்துவதாகவும் கூறினார்.

75 வயதிலும் தளராத தன்னம்பிக்கை

வயது 75-ஐ கடந்த நிலையிலும், வாழ்க்கைப் போராட்டத்தை கைவிடாமல் உழைத்து வரும் மாரியம்மாளின் கதை பலரையும் நெகிழச் செய்கிறது. குடும்ப ஆதரவு இல்லாத நிலையிலும், தனது உழைப்பையே நம்பி வாழும் அவரது மன உறுதி, வாழ்க்கையில் தன்னம்பிக்கையின் முக்கியத்துவத்தை உணர்த்துகிறது.

- சுபிக்ஷா ஆ

from Vikatan Latest news